مقالات القراء

انا حردانه..انا زمقانه بقلم: نورا عواجه

كل أهل الصعيد بلافخر والبعض من وجه بحرى يعرفوا معنى الكلمتين دول ال ليهم مدلول واحد وهو أنه الست زعلانه وسابت بيت جوزها وراحت بيت ابوها ، وطبعا شيء طبيعى فى اى بيت وفى اى مكان على وجه الارض مهما اختلف المكان والزمان ان الزوجه (تبقي حردانه وزمقانه ) وتسيب بيتها.

ونادر جدا لما تلاقى زوجه مطلعتش حردانه من بيت جوزها المهم بقي هى سابت بيت جوزها ليه ؟ اكيد مش مجنونه ولا بتدلع ولا رايحه تغير جوة، واكيد برضوا انها مش بتستهبل وعامله عبيطه ومش فاهمه ايه ال هيحصل بعد ما تخرج من بيتها خصوصا لو معاها ولاد سواء ولاد او بنات.

والخلاصه ان اى ست فينا مهما اختلفنا بيبقى جواها طاقه ايجابيه بتدى من خلالها اى حاجه لبيتها وجوزها وولادها بتدى بكل حب ورضا ومش منتظره ابدا انهم يصلوا ركعتين شكر لله او ينزلوا منشور شكر يوميا على مواقع التواصل هى بس حابه تشوف رضاهم وتسمع كلمه حلوه تجبر خاطرها مش اكتر من كده.

محتاجه شوية حب وحنان واهتمام يجددووا الشحن عندها علشان تقدر تدى وتواصل معاهم ويوم ما بتسيب بيتها .

بتسيبه لان بطاريه الطاقه الإيجابية فصلت شحن وملقتش حد يشحنها من اول وجديد بتسيبه لأنها وصلت لمرحله معينه صعب بل مستحيل حد يحسها غيرها امى الله يرحمها كانت ديما تقول (الوجع فى صحابه ، ومايحس بالنار الا إلى ماسكها) يعنى هى لو لقت حب واهتمام ومعامله طيبه فى بيت جوزها استحاله هتمشي وتسيبه ، ولما بتمشي هى عارفه كويس انها هتبقي محط الانظار وحديث المدينه وده لوحده (وجع تانى )وعارفه ان كل واحد( فضولى ) طبعا بيشرح الموضوع( من وجهة نظره العبقريه ) ويبقى شايف انها لومعملتش كده تبقي غلطانه ولازم يقام عليها الحد ، و بتبقي الزوجه بين نارين لو قالت هى زعلانه ليه لاى حد فى جملتين بعد ساعه بيبقوا كتاب وجريده والبلد كلها تبقي مش معاهم سيره غير حكايه فلانه وتفضل هى ياعينى فى حالة تبرير ودفاع عن النفس طول الوقت لسلسله من الاتهامات القاسيه ال فى منها 5 %صح و95% غلط لان اغلبية البشر بيتكلموا بناء على رايهم الخاص فقط وده ظلم شديد جدا ومن واقع تجربتى الشخصيه وال يعرفها المقربون (الرحمه حلوه والله) بلاش مزايدات ملهاش اى لازمه على حساب اى حد بلاش فتاوى على الفاضى والمليان بلاش سوء الظن والكلمه ال ليها مليون معنى ، بلاش تليمحات سخيفه وكلام جارح ، الناس فيها ال مكفيها وكفايه عليهم النصائح الذهبيه لازم تعملى كذا ولازم تقولى كذا ولازم تتصرفى بالطريقه كذا، أبسط شىء فى الدنيا الكلام والنصايح لكن لو اى حد اتحط فى نفس الموقف اظن ساعتها رايه هيتغير كتير. لانه محدش مكان حد وإذا كنا بنفضفض عن جزء من مشاكلنا فأكيد ال جوانا اكبر واوجع بكتير لأننا مش قادرين نقوله وغالبنا احنا بنمسك فى سبب معين علشان مش قادرين نقول السبب الحقيقى .

.وبعدين سيادتك هى لو قدرت تعمل كذا وقتها مكنش ده كله حصل ، هى لو عرفت تتصرف بطريقه معينه زى ماسعادتك شايفها كانت اتصرفت ليه بنتعامل مع الناس أنه لازم تفكيره يبقى زى تفكيري واحساسه زى احساسي وكمان قدرة استيعابه ورد فعله لاى مشكله لازم يبقى زى تفكيري وقدرة استيعابى ، كلنا مختلفين فى كل حاجه والنسب عندنا مختلفه فى الحب والحنان والاهتمام .

مختلفه فى الغضب والرضا .والاسراف او التبذير ، مختلفه فى الكرم والبخل والمجاملات وحب الناس والتعامل مع الاخرين ، كلنا عيوب لأننا بشر ويوم ما طاقتنا على الاحتمال تخلص لازم ناخد موقف ونعترض حتى لو غلطانين ، وبعدين ليه فى الموقف ده بالذات لازم الست تيجى على نفسها وكرامتها وكرامة أهلها علشان خاطر بيتها وولادها وليه هى ديما ال عليها الذنب ، ليه ديما هى المفروض تسامح وتغفر وتعدى علشان المركب تمشي ،ليه هى ال لازم تغير من شكلها وطبعها وتكوينها علشان البيت وعلشان الاولاد ( وان العماره مش بالساهل وخراب البيوت واعر قوى ) طبعا ده شيء معروف ومختلفناش عليه ، والست مهما غضبت وزعلت هتتنيل على عينها وعين اهلها وترجع حتى لو الوضع مش عجبها يعنى هتروح فين ! طيب.

الناس تسكت ؟! لا طبعا يفضلوا بقي هى فلانه رجعت بيتها ؟! آه رجعت طيب كانت سابت بيتها ليه لما هترجع ودى اصلها كذا وكذا. سابته علشان تغير جو فى عزبة جدو الباشا حضرتك وسابت عيالها علشان دى أوامر الحكيم والله حرام بجد.

امتى هنسيب كل واحد فى حاله ؟ أمتى هنحس ببعض بجد ؟ امتى هنبطل تخلى عيونا تشوف حاجات ماشفتهاش ونخلى ودانا تسمع حاجات مسمعتهاش.معروف طبعا ان كل واحد فينا اناني بيدور بس على الحاجه ال نقصاه ، وكلنا بنلف فى دايرة النسب المتفاوته ال مع الاسف نادر جدا مننا ال راضى من قلبه وعارف ان النسبه الناقصه عنده فى جانب معين اكيد ربنا عوضهاله فى جانب تانى وفى النهايه كلنا واحد صحيح لان ربنا اسمه العدل .

والناس لو سابت الفضول شويه ورحمت الزوجه من الاسئله المستفزه ال تحرق الدم هى هتهدى لوحدها ولازم هترجع بيتها لان الحكم الأول والأخير هنا هو ( قلب الام )

اظهر المزيد
وظائف خالية
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock