مقالات القراء

رسائل سعاده و رسائل جحيم: بقلم..نورا عواجه

من أشهر الحاجات الموجوده على الفيس بوك الرسائل اللي حضرتك بتنام وتصحى عليها كل يوم .
وال لو اهملتها هتتشوى فى نار جهنم
انت وولادك واهلك وجيرانك
وفى منها رسايل بيلزمك بعدد معين تقوله ، او تبعته لأصدقائك
وطبعا حضرتك لازم تلتزم بالعدد المطلوب وتسمع الكلام احسن الاسياد يغضبوا عليك !!
ومنها رسائل لو بعتها بعد 9 أيام بالظبط هتشوف خير كبير اوى ملهوش حدود، وحضرتك تبعتها طبعا منتظر الخير ده ، تلاقى بعد 9 أيام
حد مات ، او عربيتك اتخبطتت، او تليفونك الغالى اتسرق، او عيل من عيالك تعب..
واذا مبعتهاش وحاجه من دى حصلت؛ تفضل تسأل بينك وبين نفسك (ياترى ال حصل ده بسبب الرساله ال اهملتها )….؟
وتقول : اكيد الشيطان هو ال منعنى اعمل كده)
وتفضل فى حيره.. وهو ده المطلوب من الرسائل دى ..
واللي يقولك (لو بعت كلمه الرحمن الرحيم الملك القدوس فى 39 دقيقه
ل 29 شخص هتسمع 9 اخبار كويسه ولو اهملتها هيصيبك السوء لمدة سنه)
واضح كده ان رقم 9 له مفعول السحر وغيرها وغيرها من الحاجات المستفزه اللي تحرق الدم والاعصاب
واللي ملهاش اى مدلول غير الجهل والتخلف والمتجاره باسم الله المقدس واسم رسوله المنزه عن كل نقص وواضح جدا ان وراها
( ناس واهداف سيئه جدا) {علشان تزعزع عقيدتك وايمانك وتقلل من قيمتهم فى نظرك}
ولأن ديننا دين ترغيب وليس ترهيب ف من الطبيعي اي رسايل من النوع دا هتخلينا نبعد عن ديننا اكتر وخاصة الشباب فى زمن الفتن وال كل واحد فيه محتاج لكلمه تطمنه وتخليه يتمسك بدينه..
والشيء المؤسف فعلا إنك بتلاقى بعض الناس على قدر كبير من العلم والثقافه بيصدقوا ده ويبعت الرسائل دى فعلا لأصدقائه.
لكن فجأة !! ووسط كل النار والجحيم والشعوذة دى تلاقى حاجه حلوه حاجه راقيه جميله ورقيقه بتلمس قلبك وروحك بتغير إحساسك للنقيض، وكأنها جزء من الجنه.
فى يوم فتحت الماسنجر لقيت رساله
من الأخت والصديقة الجميله الانسانه الراقيه الدكتوره (عبير مبارك )تحمل (رسائل سعاده)  happiness.messages
Mohamed Alaa El Dein
فتحتها لقيتها حاجه مختلفه خالص عن رسائل جهنم والتهديد والوعيد اللي بنام وبنصحى عليها كل يوم، اكيد فى ناس كتير من حضراتكم يعرفها..
أجمل مافى الموضوع أنك تحس ان هناك يد خفيه، جندت نفسها لاسعادك انت بالتحديد ، فى رساله يوميه تحمل أسمك ، وكأن بينكم علاقه حب بس من نوع مختلف
بالرغم انكم متعرفوش بعض ،
رسائل سعاده بتخليك تحس ان فى حد بيحبك جدا، وخايف عليك قوى، ونفسه تكون سعيد وفرحان حقيقى ومن قلبك
رساله سعادة بتحمل الأمل والطمأنينة
وتخليك واثق فى نفسك وبتريحك من همومك وتطمنك انك مش لوحدك وربنا معاك … شايفك وحاسس بيك
وهيفرحك قريب قوى، بس انت خلى عندك يقين وقول يارب.
قول ياااااااارب مهما الشدة طالت والمحنه بقت اصعب ، قول يارب مهما خذلك الناس، وبعد عنك أقرب المقربين، قول يارب مهما اكتشفت من خيانه وغدر، ومهما كترت حواليك الوشوش المزيفه، قول يارب مهما الليل طال لانه اكيد فى نهار هيطلع
وفى شمس هتنور الدنيا حواليك

رساله سعاده…
هى قلب كبير حنين وضمير صاحى لإنسان غير عادى ، جعل إسعاد الآخرين هو غايته ومراده لدرجة ان بعض الناس افتكرت انه (مخاوى ..ههههههههه )
رساله سعاده تبناها القلب الكبير الإنسان اولا والأستاذ ثانيا “محمد علاء الدين” Mohamed Alaa El Dein
واللي مع الأسف الشديد معرفهوش معرفه شخصيه، ولا سطحيه، ولكنه قدر يوصل لقلوب وأرواح ناس كتير قوى، انا منهم وأكثرهم تأثرا وانتظارا لتلك الرسائل اليوميه؛ وكأنها طبطبه حنينه تهون
عليك آلمك ووجعك وتداوى جروحك ( محمد علاء الدين) كان جندى من جنود الخير فى الارض ، وقدر برسالة سعادة لملايين الناس يسيب أثر كبير فى نفوسنا وقلوبنا، الأثر اللي هيبقى
طول الحياه، لأننا هنمشي مهما طال العمر، لكن اثرنا فى الحياه وسيرتنا
هى اللي هتفضل..
عندى أمنيات حلوه كتير أصبح من أهمها انى أتعرف على الأستاذ
محمد علاء الدين، واعرف ازاى فكر وخطط ونفذ فكرته الجميله رسائل سعاده…
وأشكره بأسمى وباسم كل واحد أثرت فيه الرسائل دى، وبقى بيستناها كل يوم، وادعيله من كل قلبي ربنا يكرمه ويوفقه، ويرزقه سعادة الدارين، ويفرح قلبه بكل الخير اللي فى الدنيا زى مافرح قلوب ناس كتير…

وأخيرا… المقال جميل
ادخل واعمل لايك

واذا لم تفعل فاعلم ان الشيطان قد منعك ……

اظهر المزيد
وظائف خالية
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock