مقالات القراء

فى صحة المناسبات: بقلم..نورا عواجه

الشعب المصرى اكتر شعب بيعشق المناسبات ويقدسها ويحتفل بيها والشهاده لله بندى كل حاجه حقها، خصوصا وان كل الأعياد مرتبطه بالأكل.

والعزومات والخروجات ، مولد النبي .. عاوزين الحلاوه !! شم النسيم.. لازم الفسيخ والبيض الملون والملوحه وغيره .!! العاشورا..عاشورا وبليله .!! عليا ندر ¡¡ لحمه وفته ورز بلبن !! (رأس السنه )..دى لوحدها موضوع كفايه الهدايا والسهرات ال يعلم بيها ربنا والاحتفالات ال تحسسك انك حررت القدس مثلا.. او إننا بنرش القمح على روؤس الجبال حتى لا تجوع الطيور فى بلاد المسلمين .

كما فعل أمير المؤمنين عمربن عبد العزيز..اين انت ياعمر حتى ترى جياع المسلمين، رمضااااااااان بقي .. !! وما أدراك ما رمضان !! أوعى وشك .. ( ده عاوز مقال لوحده ومش هيكفى ال بيحصل فى الشهر الكريم ..ده غير المقال ال كتبته قبل كده ) وعيد الفطر ..حدث ولا حرج الكحك والبسكوت والبيتى فور والغريبه ، ده غير التسالى وباقى القائمه{ ال حتما ولابد منها } علشان محدش يقول علينا حاجه ، ولا لبس العيد !! ده لوحده عاوزه أعانه من صندوق النقد الدولى.

يا اما رب الأسره يكون واحد من صفوة المجتمع اوفنان . او لاعب كوره او {مطرب صوته وحش} هم دول ال سالكين اليومين دول ووكلينها والعه زى مابيقولوا . والعيد الكبير !! مقولكشي بقى ، المحمر والمشمر والطواجن والعزايم ونقضى حياتنا كلها بالشكل ده وتعيش البيوت ورب الأسره بالتحديد فى هم ونكد بسبب ( الطلبات الكتيره والمبالغ فيها بشكل وحش) علشان مراته وولاده يرقصوا ويهيصوا فى صحة المناسبات.. وعلى رأي صلاح منصور فى مشهد من فيلم الزوجه التانيه ، لما سعاد حسنى بتقوله على ازازة الكالونيا ال جبهالها من البندر خصوووووصى ودلقتها كلها على نفسها (خساره فياااااا رد وقلها لا..خساره ليااااااا .ههههههههه .

لان فعلا كل مظاهر الاحتفال دى خساره بمعنى الكلمه. خصوصا للناس ال بتحتفل زى ما قال الكتاب وبترفض تتنازل عن اى حاجه ، وده حرام فعلا وميرضيش ربنا (وننام ونقوووووم ونقوم وننااااااااام على اكل فى اكل ) وتخلص المناسبه ونستنى ال بعدها ، وكل تفكيرنا فى الاكل حتى لما الاكل غلى جدا والاسعار بقت فوق مستوى اى حد. وأولها الفول (اكل الغلابه ) ال مبقاش اكل الغلابه !!! ولا حول ولا قوه الا بالله والبطاطس !! لا تعليق عموما البطاطس مش كل حاجه ياجماعه ياما ناس مش بتاكل بطاطس وعايشه عادى جدا ، والسؤال المهم ؟؟ احنا استفادنا ايه معنويا من اى مناسبه سواء مولد النبي او رأس السنه الهجريه.

او رمضان او عيد الأضحى..؟ ايه ال بيتغير جوانا.؟ ايه ال بيتغير فى سلوكنا واخلاقنا ؟؟ ايه ال بنقدمه لاودلانا ولنفسنا .؟ غير أنى عملت اكل حلو (وكتير ) او إننا خرجنا واتفسحنا وهيصنا {فى صحة المناسبات} ، الايام بتجرى بشكل مرعب واحنا الدنيا اخدتنا بشكل مخيف وكل ما بتاخدنا اكتر ..كل ما بننسي قيمنا ومبادئنا .. كل ما تلف بينا الدنيا كل مابنتازل عن جزء من ديننا ومبقاش يفرق حرام من حلال 《الا من رحم ربي》 ووصل بينا الحال اننا بندفن الميت ونرجع عادى جدا وكأن الجنازه التانيه بعيده عنى او عن اى حد ونسينا ان كل واحد مستنى دوره .

أنا مش بقول كده لأنى الأفضل . بالعكس . أنا أول وأكثر العاصين المذنبين (أحب الصالحين ولست منهم) و بذكر نفسي اولا وقبل اى حد ..لانى مذنبه جدا ومقصره جدا جدا جدا . ووالله لن انجو الا ان يتغمدنى الله برحمته .. واخيرا اللهم إنى اسألك ولاحبتى وجميع المسلمين رضاك والجنه وأعوذ بك من سخطك والنار ، اللهم لا تجعل الدنيا اكبر همنا ولا مبلغ علمنا ،ولا الى النار مصيرنا ، ولا تسلط علينا بذنوبنا من لا يخافك فينا ولا يرحمنا يا ارحم الراحمين. ونسألك يارب حسن الختام.. والسلام .♡♡♡

اظهر المزيد
وظائف خالية
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock