مقالات رأي

انا مش عانس بقلم..نورا عواجه

شيء طبيعى ان سن الزواج بيتفاوت بين كل بنت والتانيه وعادى جدا ان اى بنت تتأخر شويه فى الجواز لحد سن 30 او حتى 40 عادى يعنى مش لاى سبب ، غير ان ده قدرها ونصيبها وإرادة ربنا ، وغالبا بتكون البنت دى(ست البنات وعقلها يوزن بلد ومش نقصها اى حاجه والله ) مش ناقصها بس غير ان الناس تسيبها فى حالها وتبعد عنها !! اه وربنا ،ياريت الناس تسيب كل واحد فى حاله.

لان الموضوع فى الأول وفى الاخر مسأله شخصيه محدش من حقه يتدخل او يقول رأيه غيرها وغالبا بنلاقى البنت الى سن الجواز اتاخر عندها (أكثر حبا وحنانا ورقه وعذوبه ورومانسية )هى بس عندها مواصفات معينه لشريك حياتها مش هتتنازل عنها لاى سبب ، جواها حلم جميل عاوزه تحققه ورافضه اى بديل للحياة الحقيقه الى بتتمناها.

غالبا الأهل بيجوزوا بناتهم لاى حد يشوفوه مناسب فى السن وعنده وظيفه ومعاه شقه وخلاص ، وبعدها         ( البعض ) ويقول البعض ههههههه بيظهر على حقيقته والحياه بتبقي جحيم ونلاقى البنت واهلها فى حالة ندم كبيره لانهم اتسرعوا ، وتلاقيهم ساعتها بيحسدوا اى واحده لسه متجوزتش .

ولسان الحال بيقول ( ياريت ال جرا ماكان ) لكن البنت ال سن الجواز اتاخر عندها شويه هى مش طالبه المستحيل على فكره ولاعاوزه فارس يخطفها على الحصان الأبيض ، لانها عارفه ان زمن الأساطير انتهى .

هى بس عندها هدف ومبدء وعاوزه ترتبط ب( راجل حقيقى) يعوضها سنيين الانتظار راجل بمعنى الكلمه ( يكون سند وضهر وعزوه وامان من غدر الدنيا) فشيء طبيعى انها تنتظر علشان تحقق حلمها وتعيش باقى حياتها سعيده .

ده شيء طبيعى.. بس ال مش طبيعى (هو احنا ) !! ايوه احنا !! الخلل فى تفكيرنا العقيم لاننا بنتعامل مع اى بنت اتأخرت شويه فى جوازها على انها (عانس ) وانها ناقصه ومحرومه ومعقده فى الوقت ال بنلاقيها هى        ( اهدى واعقل واروق وارقي وأجمل واشيك واحسن حال من ناس كتير متجوزه) وخصوصا لو هى موظفه وليها علاقات اجتماعية ناجحه بتبقي شيك جدا ومنظمه ومحل حب واحترام الجميع ويعتمد عليها فى كل حاجه..بس الفرق انها بعد ما تخلص شغلها بترجع بيت اهلها مش بيت جوزها ، والشيء المستفز أنك تلاقى البنات الى فى سنها واتجوزوا وخلفوا بيخافوا يحكوا قدامها عن حياتهم وولادهم وسعادتهم واستقرارهم .

قال يعنى خايفين من الحسد (و النبي تتوكسى انتى وهى ) يعنى هى هتحسدك على ايه.. والله ما بيحسد دلوقتى غير المتجوزه ومخلفه وشايله الهم..خصوصا لو جوزها طلع عكس المتوقع وطبعا الحالات كتير ..ههههههههه مين ال قال ان الاستقرار قسيمة جواز وان السعاده دبله فى الايد الشمال !؟ ليه بنتعامل بشفقه وعطف مع اى واحده اتأخرت فى الجواز شويه هو فى ايه ؟! وايه ال حصل لما فضلت شويه فى بيت ابوها ، هو بيت ابوها مش أهون من جوازه فاشله تحطمها .

مش اكرم من راجل يذلها .. مش اريح من واحد مش هيتقى ربنا فيها.. مش اعدل من انها تتجوز فى العشرين وتطلق فى التلاتين وترجع معاها 3 او 4 عيال مش عارفه هتربيهم ازاى كفايه ظلم وقسوه لاقدار الله لانها لا تملك من أمرها شيء بلاش نتعامل معاها على انها ناقصه ايد او رجل او عين ، وبلاش كل عروض الزواج تبقي يااما ارمل، يااما مطلق ، يااما طالع على المعاش ومحتاج ممرضه ، حرام بجد بلاش كل ما نقابلها نسالها هاااا .. عامله ايه ياحبيبتى ؟؟ بخير الحمد لله .. لا بجد عامله ايه ؟! هتكون عامله ايه يعنى؟! عامله محشى وملوخيه اتفضلى حضرتك (مطرح مايسرى يهرى ان شاء الله) هااااا .. هتتجوزى أمتى بقي ياقمر ؟! حضرتك هتتجوز بعد يومين وخمس ساعات و25 دقيقه !! معقوله (هو ده سؤال) هى تقدر تسأل حضرتك هتموتى امتى بقي علشان نخلص من أمثالك ونرتاح ..

قال يعنى خايفين عليها من الوحده.. على فكره الوحده صعبه فى كل حالاتها ، واصعبها مش ان البنت تفضل من غير جواز . لا.. أصعبها انها تتجوز فعلا وتحس بالوحده والغربه وهى عايشه مع جوزها ، (الوحدة هي افتقاد انسانٍ شعرتَ سابِقاً بوجوده، فوحدة الفقد أشدّ من وحدة التّمنّي)وأخيرا .. انا واثقه ان الإنسان ممكن يعيش سعيد من غير جواز او حتى فى حالة حدوث طلاق . السبب وببساطه ان ربنا اسمه العدل وحاشاه ان يظلم احد سبحانه ومش معقول ابدا انه يخلق انسان ويرزقه نص سعاده لمجرد أنه ملقيش شريك حياته ، انه الله اعدل من أنه يجعل بنت تعيش طوال حياتها نصف حياه ونصف سعاده… فدعوا الخلق للخالق… والسلام♡♡♡

اظهر المزيد
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock