مقالات رأي

جوزك على ما تعوديه..بقلم: نورا عواجه

رمضان خلص والعيد كمان…ربنا يجعل حياتكم كلها أعياد
معروف طبعا ان الأفراح بتبقى كتيره اوى بعد العيد..ربنا يرزق شبابنا وبناتنا ويسعدهم يارب
واسمحولى اقول كلمتين(واقفين فى زورى ) بس مش زورى بتاعة رامز 😃، لكل عروسه فرحها قرب اسمعى منى الكلمتين دول وربنا يقدرنا على فعل الخير….
طبعا معروف إن شهر العسل ده بيبقى اسعد ايام بيعيشها اى زوجين فتره كلها حب ومشاعر ودلع
والفتره دى بتعتبر هى الأساس لحياتهم فيما بعد ؛ فلو اى أتنين وضعوا الأساس السليم والتزموا هم الإتنين بيه ؛ بإذن الله حياتهم هتبقي سعيده .. وربنا يسعد الجميع
وفى وسط العسل والنشوه والدلع ده.(ييجى الزوج يقول لزوجته ايه!! عاوزك تندهيلى يا بابا وانا هقولك ياماما)🙈
طبعا هى علشان (هبله) بتبقى فرحانه اوى بالكلمه وفاكره انه كده بيدلعها
(ابستيلوتيلى .ده عند امه يا ادهم )
خديها منى نصيحه *
لما هيقولك ياماما معنى كده إنك هتشيلى مسؤوليات الزوجه والأم بكل حذافيرها
يعنى تقشيرله الموز وتشيلى البذر من البطيخ..وتلبسيه الشراب فى الصيف واللكلوك فى الشتا .
وتقصيله ضوافره وتحطيله المعجون على فرشة الاسنان
انك تسقيه وبينه وبين كوباية الميه شبر؛ وتديله ريموت التليفزيون يسمع ال هو عاوزه وانتى مش مهم بالإضافه…*
انك هتغسلى وتكوى وتكنسى وتمسحى وتطبخى ؛ ولازم تعملى اكل زى اكل مامته بالظبط
وطبعا متنسيش…*
انك هتحملى وتخلفى ولاد وبنات. والزمن ميعديش عليكى طبعا . لازم تفضلى ديما (ليدى ).. يعنى متشتكيش من ألم فى رجلك ولا ضهرك ولا اسنانك بسبب
الحمل والولاده ، ولا وزنك يزيد ودى اهم حاجه ؛ علشان ترضيه وترضى اهله.
الله يرحمك يا امى كانت ديما تقول
(اخوكى يحبك غنيه وجوزك يحبك عفيه ) الخلاصه ياقمرات
بلاش تنازلات طالع نازل ..سلم التنازلات بيبدء بدرجه واحده بعدها مفيش تراجع….
بلاش تدى وتدى من غير حساب
لانه مع الوقت جوزك هيعتبر ان كل ده حق مكتسب ولو فى يوم تعبتى ومقدرتيش تدى هيزعل ومش هيعذر ولا هيقدر وكل ده هيبقى على حساب صحتك واعصابك..
المركب ال فيها اتنين لازم الاتنين يقدفوا ويريحوا بعض علشان توصل لبر الامان ..
مينفعش ابدا فى اى علاقه خلقها ربنا
ان واحد بس هو الى يدى والتانى ياخد وخلاص لانه مع الوقت هيبقى انانى ومش هيفكر غير فى نفسه وبس. ومش هيبقى من حقك حتى تشتكى. وكلامى للطرفين (الراجل والست ) علشان محدش يزعل ؛
انتى زوجه يعنى زوجه وبس ، وام لولادك انتى ؛ ال حملتى وتعبتى فيهم
يعنى مش امه ولاخالته ولا المربيه الخصوصية ليه..راعى ربنا أولا وأخيرا فيه وفى بيته واولاده.
بس اعملى حدود لكل حاجه من غير ماتقصرى معاه ، من غير ماتحملى نفسك بالمسؤوليات والهموم
أدى لنفسك فرصه للراحه .للهوايه
للتعبد . شوفى اهلك واصحابك
من غير ما تيجى على بيتك واولادك
لانهم أحق ورقم واحد فى حياتك
وخليكى ديما فاكره ؛
ان ابنك على ما تربيه، وجوزك على ماتعوديه، وربنا يقدرنا على فعل الخير…

اظهر المزيد
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock