مقالات رأي

“2019” خشي برجلك اليمين.. بقلم/ نورا عواجة

ساعات قليله ويبدء عام جديد كل سنه وحضراتكم جميعاً بألف خير وصحه وسعاده وراحة بال يارب، معروف طبعاً ان (بدايه عام ميلادى) فرحه وهيصه على مستوى العالم واستعدادات خياليه فى بعض الدول، فى الوقت الى  المفروض ان ( بداية عام هجرى) يبقى الاهم والاولى بكل الاحتفالات دى ، والأهم !! ان كل تكاليف الاستعدادات المفروض دى تنصرف على الفقراء والمساكين والمحتاجين، وبدال ما نزوق طيارة بالالماس واخليها تلف العالم ، تمن الألماس ده يروح للمستحقين بجد، ولكن (اسمعت لو ناديت حياً ولكن لا حياة لمن تنادى) هيااااااا ؛ ماعلينا (فذلك لانكم تحبون الفرنجه، هههههههه)

المهم انا حبيت أبدء السنه الجديده معاكم بدعاء بتمنى من ربنا يحققه ليا وليكم ولاى حد ، هو أن ربنا يرزقنا بناس حلوه ونضيفه (مقصدش شكلها حلو ولا مستحميه ههههههه ) اقصد حلوه ونضيفه من جواها بجد وبحق وحقيقى، يعنى بتحبك كده لله من غير هدف ولا غايه ولا طمعانه فى حاجه، بتتمنالك الخير زى ماقال الرسول (لايؤمن أحدكم حتى يحب لأخيه ما يحب لنفسه) وتفرحلك باى خير يجيلك وتشوف الفرحه فى عيونهم ، ناس صافيه بوش واحد . اه والله ارزقنا يارب بناس( لها وش واحد بس !!) واللي تقوله فى وشك هو اللي تقوله من وراك .

انا اكتشفت بعد العمر ده انه أصعب حاجه انك تتعامل مع الناس ال بوشين، تبقى حضرتك بتتكلم وتضحك وتقول اللي جواك بكل طيبه ونيه صافيه، واللي قدامك بيستغل ده بدم بارد وبمنتهى( …….. ) مش لاقيه تعبير والله .

المهم تلاقيه بيتكلم عنك بناء على ضميره ونيته هو ؛ مش كده وبس ده كمان بينقل الصوره دى للناس، واحنا طبعا منتوصاش النمله عندنا بتبقي جمل ربنا يهدينا على نفسنا ويهدينا على الناس ، وارزقنا يارب (بناس حنينه) حنينه بمعنى الكلمه .. اصل الحب الحقيقى والحنان بقوا عملة صعبه جدا جدا اليومين دول، ناس لما تشوفهم قدامك تحس ان الدنيا بخير، ولما يكلموك تحس أنهم بياخدوك بالحضن وحضن حنيين اوى كمان ارزقنا يارب (بناس طيبه وع الفطره) واللي فى قلبها على لسانها على طول ، لا بتلف ولا بتدور ولا بتحور ولا تعرف اللؤم ولا الخبث ولا النفاق وارزقنا يارب (بأولاد الاصول) المحترمين المؤدبين المتربيين واللي بيعرفوا العيبه ومستحيل يعملوها .

واللي بيحترموا الكبير ويعطفوا على الصغير زى ما قال سيدنا محمد بالظبط (ليس منا من لم يرحم صغيرنا ، ويوقر كبيرنا ويأمر بالمعروف وينهى عن المنكر ) اللي ليهم كبير وبيعملوله الف حساب والناس ال بتحترم (الست) وتقدرها بجد وبيتقوا ربنا فيها وبيعاملوها بما يرضى الله ، وارزقنا يارب (بأهل الخير) اللي كل همهم( ربنا ) وبس واللى مش بيحسبولها حساب ولا بيردوا محتاج ، اللي عارفين ومتأكدين ان ربنا عنده العوض واكتر وعندهم استعداد يصرفوا اخر مليم فى جيبهم مدام لله (من ذا الذى يقرض الله قرضا حسنا فيضاعفه له اضعافا كثيره ) يقين وارزقنا يارب الصبر والبال الطويل .

صبرنا على المحن والابتلاءات ، وصبرنا ع الناس القاسيه اللي معندهمش رحمة ولا يعرفوا معنى الانسانيه . وعلمنا نحمدك ونشكر فضلك ونعمك اللي نسيناها وسط الهموم وكأنها تحصيل حاصل .

مش عوزين نبقي زى القطط تاكل وتنكر يارب ارزقنا الرضا باللي كتبته واللي انت شايفه خير واحنا مش شايفين ولا صابرين ولا فهمين حكمتك ، يارب احفظلنا الناس الحلوه اللي بتحبنا بجد وبتفتكرنا وبتخاف علينا ، اللي بتصلى وقبل ماتخلص صلاتها تدعيلنا من قلبها وأحنا منعرفش ، باركلنا فى القلوب الطيبه الحنينه اللي شيلانا ومتحملانا بكل عيوبنا. اللي حاسه بكل الكركبه اللي جوانا ولسه واقفين جمبنا وساندين وماسبوناش نتخبط لوحدنا ومهما يحصل نلاقيهم فى ضهرنا.

يارب احفظلنا الآباء والأمهات والاولاد والأخوات والأصدقاء اللي هم عزوتنا وسندنا بجد واللي الدنيا متنفعش من غيرهم ولا ليها طعم واحفظلنا صحتنا من الأمراض التى لا شفاء منها واشفى كل مريض بيتالم وانت وحدك العالم بحاله والقادرعلى تخفيف الامه ، يارب قوى الضعيف والارمله والمسكين وقليل الحيله ، يارب صبرهم وقويهم وقدرهم على حملهم التقيل فى الأيام الصعبه دى ، يارب زوج شباب وبنات المسلمين، وارزقهم رزق فاطمه بنت النبي بسيدنا على، وجمع كل القلوب المحبه واللي ناويه الحلال على كتابك وسنة نبيك ، يارب اجعله عام خير ومحبه وسعاده وفرحه وامل يارب اجعلها سنه مباركه ، لا فيها حزن ولا ألم ولا يأس ولا فقدان ولا خذلان ، خلاص تعبنا واستكفينا، عشمنا فيك كبير تجبر بخاطر كل مكسور.

يارب ارحم كل اللي فارقونا واخدوا معاهم حتة من قلوبنا وروحنا وسابونا ناقصين كل حاجه يارب ارحمهم واغفر لهم وتجاوز عن سيئاتهم، واجمعنا بيهم فى الجنه زى ما جمعتنا فى الدنيا، وارزقنا يارب من فضلك وكرمك زياره لبلد نبيك وحبيبك محمد صلى الله عليه وسلم من غير لا حول منا ولا قوه فقد ضاقت السبل عند البشر، ولكن سبلك لا تضيق، وارزقنا يارب جميعا حسن الختام، ولا تنسونا من صالح الدعاء وكل عام وحضراتكم جميعا بألف خير وعام سعيد

اظهر المزيد
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock